Entramos ya na cabera selmana de la primer temporada na que vos convidamos a Sentir Asturies.
Güei falamos d'esa Asturies tolerante, diversá y arguyosa. Arrancamos col nuesu particular filandón y coles noticies más absurdes del mundu con David Fernández.
Coneutamos con Berlín dende onde'l nuesu corresponsal Xuan Nel Turiel mos manda una carta de despedía de temporada. Nes moderneces y presumicios de Lluci Miravalles, de Ringo Rango, falamos de moda, arguyu y Rodrigo Cuevas.
Na última lleición del cursu de feminismu pa dummies d'esti cursu facemos balance con Jennifer Berrocal de cómo foi esti añu en materies d'igualdá. Acabamos cursu tamién col profesor Faustino Zapico que sigue desarmando la Historia y güei fálanos de qué hai de verdá na baxa esperanza de vida na Edá Media.
Con otru historiador, Pablo Vázquez,falamos de la ruta turística que ta acabante d'entamar en Xixón alrodiu de los hermanos Xovellanos. Damos un paseín pela viesca con Ánxeles Rodríguez que mos despide'l cursu falando de noticies un poco más positives al rodiu la natura.
Y finamos, cómo non, cola segunda parte del radioteatru "La primer fola" dirixíu por Sergio Buelga ya interpretáu por Pedro Fernández y Marcos SL.

Ver todos los episodios